Chief Minister chuan, lawmman dawngtute a lawmpui a, shooting chu sports ngaihsan hlawh tak, taksa leh rilru fim tak mamawh chi, mi bikte tan a ni, a ti. Hlawhtling taka hmarchhak bial huap inelna thlengtu Mizoram Rifles Association chungah lawmthu a sawi bawk. 

"Mizoram chuan Vision 2036 kan kalpui mek a, India chuan kum 2036 Olympic khi thlen tumin hma a la mek a, Prime Minister Pu Narendra Modi pawhin a puang tawh a nih kha. He olympic lo thleng turah hian India ram aiawh thei tur Mizo thalai tam tak neih kan duh a, naupang talent nei thate zawn chhuah a, training tha pek tumin Empowering Mizoram Sports chu kan kalpui mek a," Lalduhoma chuan a ti.

"Shooting pawh Olympic sports discipline zinga mi a nih avangin talent nei, chher tlak kan neih phawt chuan EMS hnuaiah chher theih a ni,"  tiin sorkarin infiammite tana hma a lakna a tarlang.

Lalthansanga, Organising Chairman, Minister, EF & CC ni bawk chuan kalkhawmte lawmna thu sawiin, intihsiakna fel fai taka buatsaih a nih theih nana mawhphurtute zawng zawng chungah lawmthu a sawi a. Chief Minister-in a kharna hun a hmanpui theih avangin lawmthu a sawi bawk.